អ្នកឧកញ៉ា សំអាង វឌ្ឍនៈ ៖ ចក្ខុវិស័យ ដ៏ច្បាស់លាស់ របស់ វឌ្ឍនៈ គ្រុប ក្នុងការនាំយកអ្វីដែលល្អបំផុត មកកម្ពុជា បង្កើតអ្វីដែល​ល្អបំផុត នៅកម្ពុជា និងបង្ហាញអ្វី ដែលល្អបំផុត របស់កម្ពុជា ទៅកាន់ពិភពលោក!

ភ្នំពេញ៖ អ្នកឧកញ៉ា សំអាង វឌ្ឍនៈ ថ្លែងបែបនេះ ក្នុងសន្និសីទសារព័ត៌មាន នាព្រឹកថ្ងៃទី១០ ខែកញ្ញា ឆ្នាំ២០២៦ ក្រោម វត្តមាន អញ្ជើញចូលរួម ពី ឯកឧត្តមបណ្ឌិត ជា បូរ៉ា អគ្គលេខាធិការសហព័ន្ធ​កីឡា​​វាយកូនហ្គោលកម្ពុជា, ឯកឧត្តម គឹម មិនា នាយកប្រតិបត្តិ នៃក្រុមប្រឹក្សាទេសចរណ៍កម្ពុជា អ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុន វឌ្ឍនៈ គ្រុប, លោក Mark Aspland នាយកប្រតិបត្តិការ (COO) នៃស្ថាប័ន Legends Tour ព្រមទាំង ឯកអគ្គរាជទូត ឯកអគ្គរដ្ឋទូត ក្រុមហ៊ុនដៃគូ និងបណ្តាញសារព័ត៌មានជាតិ-អន្តរជាតិ​ យ៉ាង​ច្រើនកុះករ។

អ្នកឧកញ៉ា សំអាង វឌ្ឍនៈ  ពិតជាមានមោទនភាពយ៉ាងខ្លាំង ក្នុងការប្រកាសបើកទំព័រប្រវត្តិសាស្ត្រដ៏រំភើបថ្មីមួយទៀត សម្រាប់វិស័យកីឡាវាយកូនហ្គោល វិស័យកីឡា និងវិស័យទេសចរណ៍ នៅក្នុងប្រទេសកម្ពុជា នាថ្ងៃនេះ ចាប់ពីថ្ងៃទី២៣ ខែវិច្ឆិកា ដល់ថ្ងៃទី៦ ខែធ្នូ ឆ្នាំ២០២៦ ប្រទេសកម្ពុជា នឹងធ្វើជាម្ចាស់ផ្ទះទទួលស្វាគមន៍ កំពូលកីឡាករ វាយកូនហ្គោលល្បីៗ កម្រិតពិភពលោក សម្រាប់ការប្រកួតជើងឯកអន្តរជាតិធំៗចំនួនពីរ ដែលនឹងប្រព្រឹត្តទៅនៅទីលានវាយកូនហ្គោល វឌ្ឍនៈ ហ្គោល រីសត (Vattanac Golf Resort) ។

យើងពិតជាមានមោទនភាពដែលបានចាប់ដៃគូសហការជាមួយ ឡេ ចិន ធួ Legends Tour ក្នុងការរៀបចំព្រឹត្តិការណ៍ប្រកួតដ៏អស្ចារ្យនេះអោយលេចចេញជារូបរាងឡើង។ Legends Tour គឺជាស្ថាប័នរៀបចំព្រឹត្តិការណ៍ប្រកួតកីឡាវាយកូនហ្គោលអាជីពសម្រាប់កីឡាករដែលមានអាយុចាប់ពី ៥០ ឆ្នាំឡើងទៅ និងកីឡាករមួយចំនួននៃកម្មវិធី PGA European Tour។ តាមរយៈភាពជាដៃគូនេះ យើងកំពុងនាំយកការប្រកួតកីឡាវាយកូនហ្គោលកម្រិតជើងឯកអន្តរជាតិមកកាន់ប្រទេសកម្ពុជា ដោយមានការចូលរួមពីកីឡាករដែលមានឈ្មោះបោះសម្លេង និងជោគជ័យបំផុត ក្នុងនោះរួមមានទាំងម្ចាស់ជើងឯកពានរង្វាន់ធំៗ (Major Champions), អតីតកីឡាករលំដាប់ថ្នាក់លេខ១ពិភពលោក, កីឡាករ និងប្រធានក្រុមដែលធ្លាប់ប្រកួតពានរង្វាន់ Ryder Cup, ដែលនឹងបង្កើតជាវេទិកាដ៏មានឥទ្ធិពលមួយបង្ហាញពីសក្តានុពលនៃប្រទេសកម្ពុជាទៅកាន់ពិភពលោក។

សូមជម្រាបថា ក្នុងសប្តាហ៍ទី១ (ចាប់ពីថ្ងៃទី២៣ ដល់ថ្ងៃទី២៩ ខែវិច្ឆិកា ឆ្នាំ២០២៦) យើងនឹងធ្វើជាម្ចាស់ផ្ទះរៀបចំការប្រកួត Vattanac Legends Championship ដោយមានកីឡាករវាយកូនហ្គោលអាជីពអន្តរជាតិចំនួន ៦០ រូប មកពីគ្រប់ទិសទីនៃពិភពលោក ចូលរួមប្រកួតប្រជែងតំណែងជើងឯកដែលមានប្រាក់រង្វាន់សរុបចំនួន ៦៥០,០០០ ដុល្លារអាមេរិក។

ក្នុងចំណោមនោះ កីឡាករល្បីៗលំដាប់កំពូលរបស់ពិភពលោកដែលរំពឹងថានឹងចូលរួមប្រកួត រួមមានលោក Jamie Donaldson ដែលបច្ចុប្បន្នជាកីឡាករឈរលេខរៀងទី១ លើតារាង Order of Merit, លោក Michael Campbell ម្ចាស់ជើងឯកពានរង្វាន់ Major Champion និងជាអតីតម្ចាស់ជើងឯក Lee Westwood ដែលបានបញ្ចប់ការគ្រប់គ្រងតំណែងកំពូលរយៈពេល៥ឆ្នាំរបស់លោក Tiger Woods ក្នុងតារាងចំណាត់ថ្នាក់កីឡាករវាយកូនហ្គោលពិភពលោកឆ្នាំ២០១០, លោក David Drysdale ម្ចាស់ជើងឯកនៃការប្រកួត Vattanac Legends Championship 2025, លោក Darren Fichardt ម្ចាស់ជើងឯកនៃការប្រកួត Vattanac Legends Championship Legacy Edition 2025, រួមទាំងកីឡាករឆ្នើមៗជាច្រើនរូបទៀត។ កំពូលកីឡាករទាំងនេះមិនត្រឹមតែជាម្ចាស់ជើងឯកនៅក្នុងវិស័យកីឡាវាយកូនហ្គោលប៉ុណ្ណោះទេ ថែមទាំងជា និមិត្តរូបនៃកីឡាកម្រិតអន្តរជាតិ ដែលត្រូវបានទទួលស្គាល់ និងកោតសរសើរពីសំណាក់អ្នកគាំទ្រកីឡាវាយកូនហ្គោលនៅជុំវិញពិភពលោកទៀតផង។

បន្ទាប់មក ក្នុងសប្តាហ៍ទី២ (ចាប់ពីថ្ងៃទី៣០ ខែវិច្ឆិកា ដល់ថ្ងៃទី៦ ខែធ្នូ ឆ្នាំ២០២៦) យើងនឹងបន្តធ្វើជាម្ចាស់ផ្ទះរៀបចំការប្រកួត Vattanac Tour Championship ដែលជាព្រឹត្តិការណ៍ប្រកួតកីឡាវាយកូនហ្គោលវគ្គផ្តាច់ព្រ័ត្រដ៏អស្ចារ្យបំផុតប្រចាំរដូវកាល។ ការប្រកួតដណ្តើមតំណែងជើងឯកសម្រាប់សប្តាហ៍ទី២ មានប្រាក់រង្វាន់សរុបចំនួន ៨០០,០០០ ដុល្លារអាម៉េរិក ហើយកីឡាករដែលអាចចូលរួមការប្រកួតនេះបាន លុះត្រាតែស្ថិតក្នុងចំណោមកីឡាករដែលទទួលបានចំណាត់ថ្នាក់ខ្ពស់ជាងគេ ៦០រូប នៃការប្រកួតប្រជែងក្នុងសប្តាហ៍ទី១។

សរុបមក ព្រឹត្តិការណ៍ជើងឯកទាំងពីរនេះ នឹងនាំមកនូវការប្រកួតកីឡាវាយកូនហ្គោលកម្រិតអន្តរជាតិចំនួនពីរបន្តបន្ទាប់គ្នានៅកម្ពុជា ជាមួយនឹងទំហំប្រាក់រង្វាន់សរុបរហូតដល់ ១.៤៥ លានដុល្លារអាម៉េរិក។

ចំណុចពិសេសនៃព្រឹត្តិការណ៍ប្រកួតនេះ គឺស្ថិតត្រង់ភាពដ៏កម្រដែលស្ថាប័ន Legends Tour សម្រេចចិត្តរៀបចំការប្រកួតកម្រិតជើងឯកអន្តរជាតិដល់ទៅ ២លើកជាប់ៗគ្នានៅទីតាំងប្រកួតតែមួយ និងក្នុងប្រទេសតែមួយ។ ការសម្រេចចិត្តរបស់ Legends Tour បែបនេះបានឆ្លុះបញ្ចាំងពីភាពជោគ​ជ័យ​ដ៏ត្រចះត្រចង់នៃព្រឹត្តិការណ៍ Vattanac Legends Championship និង Vattanac Legends Championship Legacy Edition កាលពីឆ្នាំមុននៅទីលានវាយកូនហ្គោល វឌ្ឍនៈ ហ្គោល រីសត ដែលបានធ្វើអោយ Legends Tour មានការជឿទុកចិត្តខ្លាំងមកលើប្រទេសកម្ពុជា និង វឌ្ឍនៈ ហ្គោល រីសត របស់ក្រុមហ៊ុន វឌ្ឍនៈ គ្រុប។ នេះ គឺជាមោទនភាពដ៏ធំធេង និងជាការឆ្លុះបញ្ចាំងពីភាពជាដៃគូដ៏រឹងមាំ និងការជឿទុកចិត្តគ្នាទៅវិញទៅមកដែលយើងបានកសាងរួមគ្នាជាមួយ Legends Tour ។

រាល់អាជីវកម្មទាំងអស់របស់ក្រុមហ៊ុន វឌ្ឍនៈ គ្រុប រាប់តាំងពីវិស័យ​ធនាគារ វិស័យលក់រាយ និងអចលនទ្រព្យ រហូតដល់បដិសណ្ឋារកិច្ច អប់រំ សួនឧស្សាហកម្ម និងទីលានវាយកូនហ្គោល ទោះបីជាស្ថិតក្នុងវិស័យផ្សេងៗគ្នាក៏ដោយ ប៉ុន្តែទស្សនវិជ្ជារបស់ក្រុមហ៊ុននៅតែដដែល គឺ៖ កសាងឧត្តមភាព លើកកម្ពស់ស្តង់ដារ បង្កើតឱកាស និងរួមចំណែកជាមួយរាជរដ្ឋាភិបាល ជានិច្ច។ មិនថាយើងធ្វើអ្វីក៏ដោយ គឺយើងធ្វើឡើងប្រកបដោយមហិច្ឆតា គុណភាព និងគោលបំណងច្បាស់លាស់ ដោយរាល់​កិច្ចការដែលយើងបានសម្រេចចិត្តធ្វើ គឺត្រូវតែប្តេជ្ញាធ្វើឱ្យបានល្អឥតខ្ចោះ។

ជាក់ស្តែង រោងចក្រស្រាបៀរ វឌ្ឍនៈ (Vattanac Brewery) ដែលមានការប្តេជ្ញាចិត្តខ្ពស់ចំពោះស្តង់ដារ និងគុណភាពនៃផលិតកម្ម បានទទួលមេដាយមាស និងពានរង្វាន់អន្តរជាតិរហូតដល់ចំនួន ១០០ ក្នុងរយៈពេលត្រឹមតែ ៤ឆ្នាំ និង ៨ខែ នៃដំណើរការ ធ្វើឱ្យ វឌ្ឍនៈ ក្លាយជារោងចក្រស្រាបៀរ និងក្រុមហ៊ុនភេសជ្ជៈដែលទទួលបានពានរង្វាន់ច្រើនជាងគេបំផុតនៅប្រទេសកម្ពុជា។ ពានរង្វាន់កិត្តិយសទាំងនេះ រួមមាន មេដាយមាស, ពានរង្វាន់ពេជ្រ និងពានរង្វាន់ ឧត្តមភាពពីគណៈវិនិច្ឆ័យ (Prize of the Jury) ដែលជាពានរង្វាន់លេចធ្លោជាងគេបំផុតមួយត្រូវបានសម្រេចប្រគល់ជូនផលិតផល វឌ្ឍនៈ ព្រីមៀម ឡាយ (Vattanac Premium Light) បន្ទាប់ពីការសម្រេចជាឯកច្ឆន្ទ ជាផលិតផលដែលគណៈវិនិច្ឆ័យពេញចិត្តបំផុត។ ការទទួលបានពានរង្វាន់ The Prize of Jury នេះ មិនត្រឹមតែជាកិត្តិយសសម្រាប់ក្រុមហ៊ុន វឌ្ឍនៈ ប៉ុណ្ណោះទេ ប៉ុន្តែថែមទាំងជាសមិទ្ធផលប្រវត្តិសាស្ត្រ និងជាមោទនភាពជាតិដ៏ធំធេងសម្រាប់ប្រទេសកម្ពុជាទាំងមូលនៅលើឆាកអន្តរជាតិផងដែរ ដោយផលិតផល វឌ្ឍនៈ ព្រីមៀម ឡាយ បានក្លាយជាផលិតផលដំបូងគេបង្អស់ផលិតក្នុងប្រទេសកម្ពុជា និងក្នុងតំបន់ ដែលបានទទួលពានរង្វាន់អន្តរជាតិដ៏អស្ចារ្យបែបនេះ។

ការគិតគូចំពោះការកសាងឧត្តមភាពនេះ ក៏អាចត្រូវបានមើលឃើញនៅទីលានវាយកូនហ្គោល វឌ្ឍនៈ ហ្គោល រីសត ផងដែរ។ ចាប់តាំងពីបើកដំណើរការ, ទីលានវាយកូនហ្គោល វឌ្ឍនៈ ហ្គោល រីសត ដែលរចនាឡើងដោយលោក Sir Nick Faldo បានទទួលពានរង្វាន់កីឡាវាយកូនហ្គោលពិភពលោក (World Golf Awards) ជាច្រើន រួមទាំងពានរង្វាន់ទីលានវាយកូនហ្គោលល្អបំផុតប្រចាំកម្ពុជា (Cambodia’s Best Golf Course) ៥ឆ្នាំជាប់ៗគ្នា និងពានរង្វាន់ទីលានវាយកូនហ្គោល ៩ឡូ ល្អបំផុតក្នុងលោក (World’s Best 9 Hole Golf Course) សម្រាប់ទីលាន The Dragon Turn ថែមទាំងត្រូវបានទទួលស្គាល់នៅក្នុងចំណោមរមណីយដ្ឋានវាយកូនហ្គោលកំពូលទាំង ១០០ លើពិភពលោក (Top 100 Golf Resort globally) ដោយគេហទំព័រ GOLF.com ទៀតផង។

ពានរង្វាន់ទាំងនេះ ឆ្លុះបញ្ចាំងពីគុណវុឌ្ឍិ ស្តង់ដារ និងគុណភាព នៃទីលានវាយកូនហ្គោល, សេវាកម្ម, និងបដិសណ្ឋារកិច្ច ព្រមទាំងទំនុកចិត្តចំពោះ វឌ្ឍនៈ ហ្គោល រីសត ក្នុងការធ្វើជាម្ចាស់ផ្ទះរៀបចំការប្រកួតជើងឯកអន្តរជាតិដ៏ធំបែបនេះ។

ការរៀបចំព្រឹត្តិការណ៍ប្រកួតកីឡាវាយកូនហ្គោលអន្តរជាតិដ៏ធំនេះ គឺជាឱកាសដ៏ប្រពៃបំផុតក្នុងការនាំពិភពលោកមកកាន់ប្រទេសកម្ពុជា និងបង្ហាញពិភពលោកឱ្យបានឃើញពីអ្វីៗដែលល្អបំផុតរបស់ប្រទេសកម្ពុជាដែលរួមមាន ប្រវត្តិសាស្ត្រដ៏អស្ចារ្យ និងបេតិកភណ្ឌវប្បធម៌ដ៏សម្បូរបែប តំបន់ទេសចរណ៍ដ៏ស្រស់ស្អាត ម្ហូបអាហារដ៏ឈ្ងុយឆ្ងាញ់ ហេដ្ឋារចនាសម្ព័ន្ធខ្វាត់ខ្វែងដែលអភិវឌ្ឍឥតឈប់ឈរ និងទីលានកីឡាស្តង់ដារអន្តរជាតិដ៏ស្រស់ស្អាត ជាដើម រួមទាំងប្រជាជនកម្ពុជាដែលពោរពេញដោយស្នាមញញឹម ភាពកក់ក្តៅរួសរាយរាក់ទាក់ និងសេចក្តីថ្លៃថ្នូរ។

តាមរយៈការមកដល់របស់ក្រុមកីឡាករឆ្នើមលំដាប់ពិភពលោកមកកាន់ប្រទេសកម្ពុជា, ពួកគាត់នឹងនាំមកជាមួយនូវប្រព័ន្ធផ្សព្វផ្សាយអន្តរជាតិ ក្រុមការងាររៀបចំការប្រកួត អ្នកឧបត្ថម្ភកម្មវិធី ព្រមទាំងអ្នកគាំទ្រ និងទស្សនិកជនមកពីគ្រប់ទិសទីជុំវិញពិភពលោក។ ភ្ញៀវទាំងនេះនឹងជួយណែនាំប្រទេសកម្ពុជាទៅកាន់មនុស្សរាប់លាននាក់បន្តទៀត អំពីទីកន្លែងដែលពួកគាត់បានទៅទស្សនា មនុស្សដែលពួកគាត់បានជួប រួមទាំងបទពិសោធន៍ដែលពួកគាត់បានទទួលផងដែរ។

ផ្នែកដ៏សំខាន់មួយទៀតនៃព្រឹត្តិការណ៍ប្រកួតរយៈពេលពីរសប្តាហ៍នេះ គឺកម្មវិធីប្រកួតរួមគ្នា Pro-Am (Professional​​-Amateur) ដែលនឹងផ្តល់ឱកាសឱ្យកីឡាករវាយកូនហ្គោលក្នុងស្រុក បានចូលរួមលេងរួមគ្នាជាមួយនឹងកីឡាករវាយកូនហ្គោលអាជីពលំដាប់អន្តរជាតិទាំងនេះ។ កម្មវិធីប្រកួតរួមគ្នា Pro-Am នឹងមានរៀបចំទាំងនៅទីលានវាយកូនហ្គោល វឌ្ឍនៈ រីសត រាជធានីភ្នំពេញនិងនៅរមណីយដ្ឋាន អង្គរ ហ្គោល រីសត (Angkor Golf Resort) ក្នុងខេត្តសៀមរាប ដែលជាខេត្តគោលដៅទេសចរណ៍ដ៏ល្បីល្បាញបំផុតរបស់ប្រទេសកម្ពុជាដើម្បីស្វែងយល់និងទទួលយកបទពិសោធន៍អំពីបេតិកភណ្ឌវប្បធម៌ និងប្រវត្តិសាស្ត្រអស្ចារ្យរបស់ប្រទេសកម្ពុជា។ ក្នុងន័យនេះ ខ្ញុំសូមគោរពអញ្ជើញកីឡាករវាយកូនហ្គោលនៅក្នុងប្រទេសកម្ពុជាទាំងអស់ ចូលរួមប្រកួតប្រជែង និងចូលរួមលេងជាមួយកំពូលកីឡាករល្បីៗក្នុងពិភពលោក ដើម្បីផ្លាស់ប្តូរបទពិសោធន៍ បង្កើតមិត្តភាព ក៏ដូចជាចូលរួមស្វាគមន៍ម្ចាស់ជើងឯករបស់ពិភពលោកមកកាន់ប្រទេសកម្ពុជាយើងដោយផ្ទាល់ទាំងអស់គ្នា។

បន្ថែមលើនេះ កាលពីឆ្នាំមុន យើងបានបង្កើតព្រឹត្តិការណ៍ដ៏ពិសេសមួយ គឺកម្មវិធី Tonle Sap Challenge ដែលកីឡាករវាយកូនហ្គោលអាជីពបានប្តូរពីការវាយកូនហ្គោលនៅលើទីលានវាលស្មៅ មកជាការវាយកូនហ្គោលចេញពីតំបន់មាត់ទន្លេចតុមុខតម្រង់ទៅគោលដៅនៅលើសាឡង់ខ្សាច់ ហើយព្រឹត្តិការណ៍នេះបានផ្សារភ្ជាប់គ្នារវាងកីឡាវាយកូនហ្គោល, ទេសចរណ៍, និងការកម្សាន្តយ៉ាងទាក់ទាញបំផុត។ ឆ្នាំនេះ យើងមានបំណងរៀបចំកម្មវិធី Tonle Sap Challenge ឱ្យកាន់តែធំ និងកាន់តែប្រសើរជាងមុន ដោយផ្សារភ្ជាប់ជាមួយនឹងអត្តសញ្ញាណខ្មែរអោយកាន់តែឃើញច្បាស់ ដែលធ្វើអោយកម្មវិធីកាន់តែមានលក្ខណៈពិសេសទាក់ទាញប្លែកគេ។

យើងជឿជាក់ថា តាមរយៈបទពិសោធន៍នៃការប្រកួតដ៏អស្ចារ្យនេះ បូករួមទាំង វប្បធម៌ បេតិកភណ្ឌ បដិសណ្ឋារកិច្ច និងប្រជាជននៃប្រទេសកម្ពុជា នឹងក្លាយជាភាពទាក់ទាញដ៏សំខាន់ដែលនាំឱ្យក្រុមកីឡាករកំពូលលំដាប់ពិភពលោកទាំងនេះចងចាំពីប្រទេសកម្ពុជា បន្តការនិទានរៀបរាប់អំពីកម្ពុជា និងត្រឡប់មកកាន់កម្ពុជាវិញសារជាថ្មីនាពេលខាងមុខ។

ទាំងនេះគឺជាមហិច្ឆតារបស់ វឌ្ឍនៈ ដែលចង់ឱ្យប្រទេសកម្ពុជាត្រូវ​បានពិភពលោកស្គាល់ និងកាន់តែជឿទុកចិត្តច្រើនឡើង ក្នុងនាមជាប្រទេសគោលដៅសម្រាប់កីឡាវាយកូនហ្គោល វិស័យកីឡា ទេសចរណ៍ និងការវិនិយោគ។

គោលបំណងចម្បងមួយទៀតរបស់ ក្រុមហ៊ុន វឌ្ឍនៈ គឺការបន្តចូលរួមអភិវឌ្ឍ និងបណ្តុះបណ្តាលវិស័យកីឡាវាយកូនហ្គោលនៅក្នុងប្រទេសកម្ពុជា ជាពិសេសក្នុងចំណោមយុវជនជំនាន់ក្រោយទាំងប្រុស ទាំងស្រី អោយកាន់តែច្រើនឡើង ដើម្បីអោយយុវជនទាំងនេះអាចឈ្វេងយល់ រៀនសូត្រ លេង និងអភិវឌ្ឍសក្តានុពលរបស់ខ្លួនក្នុងកីឡាវាយកូនហ្គោលនេះ។ កីឡាវាយកូនហ្គោលក៏បង្រៀនពីវិន័យ ភាពអត់ធ្មត់ ការគោរព ភាពស្មោះត្រង់ និងស្មារតីកីឡា ដែលជាគុណតម្លៃដ៏ល្អផូផង់លើសពីសកម្មភាពនៅលើទីលានវាយកូនហ្គោលផងដែរ។

ការនាំយកក្រុមកីឡាករវាយកូនហ្គោលដ៏ឆ្នើមបំផុតរបស់ពិភពលោកមកកាន់កម្ពុជា គឺជាការបញ្ជូនសារដ៏មានឥទ្ធិពលបំផុតមួយសម្រាប់យុវជនកម្ពុជាក្នុងការបំផុសចិត្តគំនិត (Inspiration) ។ ថ្ងៃណាមួយ ក្នុងចំណោមយុវជនកម្ពុជាដែលបានចូលរួមទស្សនាការប្រកួតពានរង្វាន់ជើងឯកនេះ ប្រហែលជាអាចនឹងក្លាយជាម្ចាស់ជើងឯករបស់កម្ពុជានាពេលអនាគត ឬក្លាយជាកីឡាករវាយកូនហ្គោលអាជីពតំណាងប្រទេសកម្ពុជាចូលរួមក្នុងការប្រកួតប្រជែងជាលក្ខណៈអន្តរជាតិ ហើយគ្រវីទង់ជាតិប្រទេសកម្ពុជាដោយមោទនភាព សម្រាប់ជាការបំផុសចិត្តគំនិតបន្តដល់យុវជនជំនាន់ក្រោយៗទៀត។ កិច្ចខិតខំប្រឹងប្រែងក្នុងការចូលរួមអភិវឌ្ឍវិស័យកីឡាវាយកូនហ្គោលទាំងនេះ ក៏ត្រូវបានសហព័ន្ធឧស្សាហកម្មកីឡាវាយកូនហ្គោលអាស៊ី (Asian Golf Industry Federation) ផ្តល់ពានរង្វាន់ “ការរួមចំណែកដ៏ឆ្នើមក្នុងការអភិវឌ្ឍវិស័យកីឡា” (Distinguished Contribution to Growing the Game) ដល់ វឌ្ឍនៈ ហ្គោល រីសត ផងដែរកាលពីឆ្នាំមុន។

កីឡាមានថាមពលដ៏ពិសេសក្នុងការផ្សារភ្ជាប់ភាសា វប្បធម៌ និងមនុស្សនៅគ្រប់ទិសទីជុំវិញពិភពលោក។ ការប្រកួតជើងឯកនីមួយៗ នឹងនាំឱ្យយើងបោះជំហានទៅមុខជាបន្តបន្ទាប់។ ភ្ញៀវទេសចរអន្តរជាតិនីមួយៗនឹងជួយនាំយកសាច់រឿងរបស់ប្រទេសកម្ពុជាទៅផ្សព្វផ្សាយបន្តកាន់តែច្រើនឡើងៗ។ យុវជនទាំងអស់ដែលទទួលបានការបំផុសចិត្តគំនិតពីក្រុមកីឡាករកំពូលៗរបស់ពិភពលោក នឹងចូលរួមពង្រឹងអនាគតរបស់កម្ពុជាកាន់តែរឹងមាំ។

ដូច្នេះ ខ្ញុំសូមលើកទឹកចិត្ត និងអញ្ជើញសាធារណជនទាំងអស់មកកាន់ទីលានវាយកូនហ្គោល វឌ្ឍនៈ ហ្គោល រីសត ក៏ដូចជានាំក្រុមគ្រួសារ និងមិត្តភក្តិមកចូលរួមទស្សនាការប្រកួតដ៏អស្ចារ្យរបស់កំពូលកីឡាករវាយកូនហ្គោលល្បីៗដោយផ្ទាល់អោយបានច្រើនកុះករ ដើម្បីមកទទួលយកបទពិសោធន៍នៃការប្រកួតកីឡាវាយកូនហ្គោលកម្រិតអន្តរជាតិផង ក៏ដូចជាចូលរួមស្វាគមន៍ពិភពលោកមកកាន់ប្រទេសកម្ពុជារបស់យើងទាំងអស់គ្នាផងដែរ។

ចំណុចដែលសំខាន់បំផុត គឺសមិទ្ធផលទាំងឡាយដែលបានបន្សល់ទុកពីព្រឹត្តិការណ៍ប្រកួតជើងឯកទាំងនេះ ដែលរួមមាន ការទទួលស្គាល់កាន់តែខ្លាំងសម្រាប់ប្រទេសកម្ពុជា, ទំនាក់ទំនងកាន់តែជិតស្និទ្ធរឹងមាំជាមួយពិភពលោក, ការបំផុសចិត្តគំនិតកាន់តែផុលផុសសម្រាប់យុវជនកម្ពុជា, និងការជឿទុកចិត្តកាន់តែខ្ពស់ចំពោះអ្វីដែលប្រទេសកម្ពុជាអាចសម្រេចបាន។

នៅពេលដែលការវាយឡូចុងក្រោយត្រូវបានបញ្ចប់ ភាពជោគជ័យរបស់យើង នឹងមិនត្រូវបានវាស់វែងតែលើការរៀបចំ ឬ លទ្ធផលនៃការប្រកួតប៉ុណ្ណោះទេ តែក៏នឹងត្រូវបានវាស់វែងតាមរយៈមិត្តភាពដែលយើងបានបង្កើត យុវជនដែលយើងបានបំផុសចិត្តគំនិត ភ្ញៀវដែលត្រឡប់ទៅផ្ទះវិញដោយក្តីរីករាយនិងស្ងើចសរសើរពីកម្ពុជា ព្រមទាំងការជឿទុកចិត្តដែលយើងបានរួមគ្នាបង្កើតឡើងសម្រាប់ប្រទេសកម្ពុជាទាំងមូល។

ទាំងនេះ គឺជាចក្ខុវិស័យ ដ៏ច្បាស់លាស់របស់ វឌ្ឍនៈ គ្រុប ក្នុងការនាំយកអ្វីដែលល្អបំផុតមកកម្ពុជា, បង្កើតអ្វីដែល​ល្អបំផុតនៅកម្ពុជា, និងបង្ហាញអ្វីដែលល្អបំផុតរបស់កម្ពុជាទៅកាន់ពិភពលោក។ ទាំងនេះ ក៏ជាមហិច្ចតា ការប្តេជ្ញាចិត្ត និងកេរដំណែលដែលយើងចង់បង្កើតឡើងរួមគ្នាផងដែរ។

មុននឹងបញ្ចប់ អ្នកឧកញ៉ា សំអាង វឌ្ឍនៈ សូមអរគុណយ៉ាងជ្រាលជ្រៅផងដែរចំពោះស្ថាប័ន Legends Tour សម្រាប់ទំនុកចិត្តដែលបានផ្តល់មកលើប្រទេសកម្ពុជា និងវឌ្ឍនៈ ហ្គោល រីសត ព្រមទាំងកិច្ចសហការយ៉ាងជិតស្និទ្ធ ក្នុងការនាំយកព្រឹត្តិការណ៍ប្រកួតជើងឯកវាយកូនហ្គោលលំដាប់ពិភពលោកទាំងពីរនេះមកកាន់ប្រទេសកម្ពុជា។

សូមអរគុណអ្នកឧបត្ថម្ភកម្មវិធី និងដៃគូអាជីវកម្មទាំងអស់ សម្រាប់ការជឿជាក់លើចក្ខុវិស័យរបស់ក្រុមហ៊ុន វឌ្ឍនៈ និងការគាំទ្រចំពោះដំណើរមួយនេះ។

សូមអរគុណដៃគូផ្សព្វផ្សាយក្នុងស្រុក និងអន្តរជាតិទាំងអស់ សម្រាប់ការជួយផ្សព្វផ្សាយព្រឹត្តិការណ៍ប្រកួតជើងឯកដ៏អស្ចារ្យទាំងនេះ ក៏ដូចជាសាច់រឿងល្អៗរបស់ប្រទេសកម្ពុជា ទៅកាន់ទស្សនិកជននៅជុំវិញពិភពលោក។

យើងរួមគ្នាធ្វើឱ្យព្រឹត្តិការណ៍ប្រកួតដ៏អស្ចារ្យនេះ មិនត្រឹមតែជាការប្រកួតជើងឯក ប៉ុណ្ណោះទេ ប៉ុន្តែជាការអបអរសាទររបស់ប្រទេសកម្ពុជា និងជាជំហានឆ្ពោះទៅមុខថ្មីមួយទៀត ក្នុងការបង្ហាញពិភពលោក ឱ្យឃើញពីអ្វីៗ ដែលប្រទេសកម្ពុជាមាន។

អ្នកឧកញ៉ា សំអាង វឌ្ឍនៈ សូមជូនពរឱ្យអ្នកទាំងអស់គ្នា មានសុខភាពល្អ សុភមង្គល និងទទួលបានជោគជ័យជាបន្តបន្ទាប់។