សំណល់ប្លាស្ទិក បានបង្កការគំរាមកំហែងយ៉ាងធ្ងន់ធ្ងរដល់បរិស្ថាន ជីវជម្រុះ សុខភាពមនុស្ស និងសេដ្ឋកិច្ចជាតិ

ភ្នំពេញ ៖​ សំណល់ប្លាស្ទិក ក្នុងប្រទេសកម្ពុជាបានកើនឡើងដោយសារតែកំណើនប្រជាពលរដ្ឋ កំណើនជីវភាពនិងសេដ្ឋកិច្ច ការផ្លាស់ប្តូរឥរិយាបទក្នុងការប្រើប្រាស់ និងការប្រើប្រាស់ប្លាស្ទិកសម្រាប់វេចខ្ចប់ម្ហូបអាហារ ឬសម្ភារផ្សេងៗ និង កខ្វះខាតចំណេះដឹងក្នុងការញែកសំរាម។

សព្វថ្ងៃ ការប្រើប្រាស់ប្លាស្ទិកមានការកើនឡើងជាកំហុក គិតចាប់តំាងពីការនាំចូលប្លាស្ទិកមក ប្រទេសកម្ពុជាជាង ២៥ឆ្នាំមុន។ បច្ចុប្បន្ននេះ ថង់ប្លាស្ទិកប្រមាណ ១០ លានថង់ ត្រូវបានប្រើប្រាស់ជារៀងរាល់ថ្ងៃនៅក្នុងទីក្រុងភ្នំពេញ ខណៈដែលប្រជាជនពលរដ្ឋកម្ពុជាម្នាក់ៗដែលរស់នៅក្នុងទីក្រុងនានា ប្រើប្រាស់ថង់ប្លាស្ទិកជាង ២, ០០០ ថង់ក្នុងមួយឆ្នាំ។ នៅក្នុងប្រទេសកម្ពុជា  បើតាមរបាយការណ៍របស់អង្គការសត្វព្រៃ និងរុក្ខជាតិអន្តរជាតិ (Fauna & Flora International) ឆ្នាំ ២០១៩  ប្រជាពលរដ្ឋរស់នៅតាមតំបន់ឆ្នេរ ក្នុងមួយខ្នងផ្ទះប្រើប្រាស់ថង់ប្លាស្ទិកជាមធ្យមចំនួន១២ថង់ ក្នុងមួយថ្ងៃ  ហើយបរិមាណសំណល់ប្លាស្ទិកប្រមាណជា ៤៨% ត្រូវបានបោះចោលចូលទៅក្នុងសមុទ្រ។  កំណើនបរិមាណសំណល់ប្លាស្ទិក បានបង្កការគំរាមកំហែងយ៉ាងធ្ងន់ធ្ងរដល់បរិស្ថាន ជីវជម្រុះ សុខភាពមនុស្ស និងសេដ្ឋកិច្ចជាតិ។

នេះបើយោងតាមការបញ្ជាក់របស់ ក្រសួងបរិស្ថាន។

ដោយឡែក នៅព្រឹកថ្ងៃព្រហស្បតិ៍​ ៧កើត​ ខែពិសាខ​ ឆ្នាំមមី​ អដ្ឋស័ក​ ព.ស​ ២៥៦៩​ ត្រូវនឹងថ្ងៃទី២៣​ ខែមេសា​ ឆ្នាំ២០២៦​ វេលាម៉ោង​ ៨ និង០០នាទីព្រឹក​ បានរៀបចំសិក្ខាសាលា​លើកកម្ពស់ការយល់ដឹង​ ស្តីពីការ​គ្រប់គ្រង​សំណល់អាហារ​ និងការប្រើប្រាស់ប្លាស្ទិកប្រើតែម្តង។
ក្រោមអធិបតីភាព លោក​ ប៉ាង​ លីដា​ អភិបាលរងខណ្ឌ​ តំណាងលោក​ សក់​ ច័ន្ទកញ្ញារិទ្ធ​ អភិបាលនៃគណៈអភិបាលខណ្ឌពោធិ៍សែនជ័យ

លោកបណ្ឌិត​ កែវ​ ​ វ៉ាន់ធឿន​ អនុប្រធាន​នាយកដ្ឋាន​សេដ្ឋកិច្ច​បៃតង​ នៃអគ្គនាយកដ្ឋានគោលនយោបាយ​ និង​យុទ្ធសាស្ត្រ​ ក្រសួង​បរិស្ថាន​។ ដោយ​មាន​សិក្ខាកាម​អញ្ជើញចូលរួមសរុបចំនួន២៧នាក់។