ជនរួមជាតិខ្មែរណាមបូ៖ ស្ពានតភ្ជាប់ការទូតប្រជាជន ជំរុញទំនាក់ទំនង កម្ពុជា – វៀតណាម

​

តំបន់ណាមបូនៃប្រទេសវៀតណាម គឺជាតំបន់វប្បធម៌មួយដែលមានការរលាយចូលគ្នានៃជនជាតិជាច្រើន (រួមមាន ជនជាតិគីញ ខ្មែរ ចិន ចាម…) ដែលក្នុងនោះ បងប្អូនជនរួមជាតិខ្មែរ គឺជាសហគមន៍ជនជាតិភាគតិចដែលមានចំនួនប្រជាជនយ៉ាងច្រើន បើគិតជាតួលេខគឺមានជិត ១,៣ លាននាក់។ បងប្អូនជនរួមជាតិខ្មែរណាមបូ រស់នៅលាយឡំជាមួយជនជាតិគីញ ចិន ចាម ហើយភាគច្រើនរស់នៅក្នុងបណ្តាតំបន់ ដូចជា៖ ខេត្តតៃនីញ ​ ខេត្តដុងថាប់ ខេត្តវិញឡុង​ ទីក្រុងកិនថឺ ខេត្តអានយ៉ាង​ និងខេត្តកាម៉ៅ ។ ​

ទំនាក់ទំនងមិត្តភាពដ៏ជិតស្និទ្ធរវាង កម្ពុជា និង វៀតណាម គឺមានប្រវត្តិសាស្ត្រដ៏យូរលង់ណាស់មកហើយ មុនពេលដែលប្រទេសទាំងពីរបានបង្កើតទំនាក់ទំនងការទូតជាផ្លូវការនៅថ្ងៃទី២៤ ខែមិថុនា ឆ្នាំ១៩៦៧ ហើយទំនាក់ទំនងនេះត្រូវបានរឹតបន្តឹងជាបន្តបន្ទាប់ ក្នុងស្មារតីជាអ្នកជិតខាងល្អ សាមគ្គីភាព ទំនុកចិត្ត ការយល់ដឹងពីគ្នាទៅវិញទៅមក និងកិច្ចសហប្រតិបត្តិការឈ្នះ-ឈ្នះ។ ប្រជាជននៃប្រទេសទាំងពីរបានឆ្លងកាត់ការលំបាក និងការលះបង់ជាច្រើនជាមួយគ្នាក្នុងបុព្វហេតុរំដោះជាតិ ដណ្តើមឯករាជ្យ បង្រួបបង្រួមជាតិ និងអភិវឌ្ឍន៍ប្រទេសជាតិ។ នាពេលបច្ចុប្បន្ននេះ ទំនាក់ទំនងភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និរន្តរភាព និងយូរអង្វែងរវាង កម្ពុជា – វៀតណាម បន្តត្រូវបានពង្រឹង និងអភិវឌ្ឍលើគ្រប់វិស័យ ចាប់តាំងពីនយោបាយ ការទូត សេដ្ឋកិច្ច-សង្គម សន្តិសុខ-ការពារជាតិ វប្បធម៌ ទេសចរណ៍ អប់រំ… រហូតដល់ការផ្លាស់ប្តូររវាងប្រជាជន និងប្រជាជន។

សេចក្តីសម្រេចចិត្តលេខ ៥៩-NQ/TW របស់ការិយាល័យនយោបាយនៃបក្សកុម្មុយនីស្តវៀតណាម បានកំណត់យ៉ាងច្បាស់ថា៖ «កិច្ចការបរទេស គឺជាកម្លាំងចលករដ៏សំខាន់មួយក្នុងការអភិវឌ្ឍន៍ប្រទេសជាតិឱ្យបានឆាប់រហ័ស និងប្រកបដោយចីរភាព ដោយត្រូវបានអនុវត្តក្នុងពេលដំណាលគ្នានៅលើសសរស្តម្ភទាំងបីគឺ៖ កិច្ចការបរទេសរបស់បក្ស ការទូតរដ្ឋ និងកិច្ចការបរទេសប្រជាជន»។ នៅក្នុងទិដ្ឋភាពទូទៅនោះ កិច្ចការបរទេសប្រជាជនមានតួនាទីជាគ្រឹះសង្គមដ៏រឹងមាំ ក្នុងការជួយពង្រឹងទំនុកចិត្តដោយផ្ទាល់ បង្កើនភាពជិតស្និទ្ធ និងការយល់ដឹងរវាងប្រជាជននៃបណ្តាប្រទេសនានា រួមចំណែកកសាង «ជំហរចិត្តសាស្ត្រប្រជាជន» ឱ្យបានរឹងមាំចាប់ពីថ្នាក់មូលដ្ឋានទៅ។

ក្នុងចរន្តនៃសមាហរណកម្ម និងការអភិវឌ្ឍ កិច្ចការបរទេសប្រជាជនកាន់តែបង្ហាញឱ្យឃើញច្បាស់នូវតួនាទីជា «អំណាចទន់» ក្នុងការផ្សាភ្ជាប់ចំណងមិត្តភាពរវាងបណ្តាប្រទេសនានា។ នៅតាមបណ្តាខេត្តជាប់ព្រំដែននៃប្រទេសទាំងពីរ កម្ពុជា – វៀតណាម សកម្មភាពផ្លាស់ប្តូររវាងប្រជាជន និងប្រជាជន មិនត្រឹមតែមានអត្ថន័យផ្នែកកិច្ចការបរទេសប៉ុណ្ណោះទេ ​ថែមទាំងបានរួមចំណែកផ្ទាល់ក្នុងការរក្សាសន្តិសុខព្រំដែន ជំរុញការអភិវឌ្ឍសេដ្ឋកិច្ច-សង្គមកិច្ច និងពង្រឹងសាមគ្គីភាពដ៏រឹងមាំរវាងប្រជាជាតិទាំងពីរផងដែរ។

ការបង្កើនតភ្ជាប់ផ្នែកពាណិជ្ជកម្ម ​វិនិយោគ ហេដ្ឋារចនាសម្ព័ន្ធ ហិរញ្ញវត្ថុ-ធនាគារ និងខ្សែសង្វាក់ផ្គត់ផ្គង់ ព្រមទាំងការបង្កលក្ខណៈអនុគ្រោះដល់សហគ្រាសនៃប្រទេសទាំងពីរក្នុងការពង្រីកកិច្ចសហប្រតិបត្តិការ គឺដើម្បីខិតខំជំរុញទំហំពាណិជ្ជកម្មទ្វេភាគីឱ្យសម្រេចបានដល់ ២០ ពាន់លានដុល្លារអាមេរិក នាពេលឆាប់ៗខាងមុខ ដែលសមស្របទៅនឹងសក្តានុពល ចំណុចខ្លាំង និងកម្រិតនៃការផ្សារភ្ជាប់គ្នានៃសេដ្ឋកិច្ចទាំងពីរ។ កិច្ចសហប្រតិបត្តិការលើវិស័យការពារជាតិ និងសន្តិសុខ ត្រូវបានចាត់ទុកជាសសរស្តម្ភដ៏សំខាន់មួយក្នុងទំនាក់ទំនងទ្វេភាគី ជាមួយនឹងការប្តេជ្ញាចិត្តយ៉ាងម៉ឺងម៉ាត់មិនអនុញ្ញាតឱ្យកម្លាំងអរិភាពណាមួយ ប្រើប្រាស់ទឹកដីនៃប្រទេសនេះ ដើម្បីប្រឆាំងនឹងប្រទេសនោះឡើយ។ ទន្ទឹមនឹងនេះ ប្រទេសទាំងពីរក៏បានរួមគ្នាជំរុញកិច្ចសហប្រតិបត្តិការក្នុងការបង្ក្រាបបទល្មើស ជាពិសេសគឺបទល្មើសឆ្លងដែន បទល្មើសគ្រឿងញៀន និងបទល្មើសបច្ចេកវិទ្យាកម្រិតខ្ពស់ ដើម្បីរួមចំណែករក្សាសន្តិសុខ និងស្ថិរភាព បម្រើឱ្យការអភិវឌ្ឍរបស់ប្រទេសនីមួយៗ ក៏ដូចជាតំបន់ទាំងមូល។

ទន្ទឹមនឹងនោះ សកម្មភាពផ្លាស់ប្តូរមិត្តភាព ការផ្លាស់ប្តូរគណៈប្រតិភូ ការចុះហត្ថលេខា និងការអនុវត្តកម្មវិធីសម្របសម្រួលរវាងមូលដ្ឋាននៃប្រទេសទាំងពីរ ត្រូវបានរក្សាជាប្រចាំ និងកាន់តែឈានចូលស៊ីជម្រៅ។ សកម្មភាពប្រជុំប្រចាំការ ការផ្លាស់ប្តូរព័ត៌មាន ការសម្របសម្រួលការឃោសនាផ្សព្វផ្សាយ និងការចលនាប្រជាពលរដ្ឋនៅតាមបណ្តាខេត្តជាប់ព្រំដែននៃភាគីទាំងពីរឱ្យគោរពច្បាប់ គឺបន្តត្រូវបានរក្សាឡើងយ៉ាងមានប្រសិទ្ធភាព ដែលរួមចំណែកយ៉ាងសំខាន់ក្នុងការរក្សាស្ថិរភាពនៅតំបន់ព្រំដែន។

ក្នុងនោះ បងប្អូនជនរួមជាតិខ្មែរណាមបូ មានតួនាទីយ៉ាងសំខាន់ក្នុងការរឹតបន្តឹង និងជំរុញទំនាក់ទំនងរវាងប្រទេសទាំងពីរ ជាពិសេសគឺការផ្លាស់ប្តូរវប្បធម៌ តាមរយៈទំនៀមទម្លាប់ ប្រពៃណី ជំនឿ សាសនា និងពិធីបុណ្យប្រពៃណីដ៏ល្អផូរផង់របស់បងប្អូនជនជាតិខ្មែរ ដូចជា៖ បុណ្យចូលឆ្នាំថ្មីប្រពៃណីជាតិ បុណ្យសែនដូនតា និងជាពិសេសគឺពិធីបុណ្យអុំទូក បណ្តែតប្រទីប និងសំពះព្រះខែ អកអំបុក​ ជាដើម…។

បុណ្យចូលឆ្នាំថ្មីប្រពៃណី គឺជាពិធីបុណ្យដ៏ធំបំផុតប្រចាំឆ្នាំរបស់ប្រជាពលរដ្ឋកម្ពុជា ក៏ដូចជាបងប្អូនជនរួមជាតិខ្មែរជាង ១,៣ លាននាក់នៅប្រទេសវៀតណាមផងដែរ។ ហួសពីក្របខ័ណ្ឌនៃពិធីបុណ្យប្រពៃណីធម្មតា បុណ្យចូលឆ្នាំថ្មីប្រពៃណីជាតិក៏ជាស្ពានតភ្ជាប់វប្បធម៌មួយដ៏មានអត្ថន័យមនុស្សសាស្ត្រយ៉ាងជ្រាលជ្រៅ។ សកម្មភាពផ្លាស់ប្តូរ និងការជួបប្រាស្រ័យគ្នារវាងបងប្អូនជនជាតិខ្មែរវៀតណាម និងប្រជាជនកម្ពុជា ក្នុងឱកាសបុណ្យចូលឆ្នាំថ្មីប្រពៃណីជាតិនេះ បានរួមចំណែកពង្រឹង និងជំរុញការយល់ដឹងពីគ្នាទៅវិញទៅមក ទំនុកចិត្ត និងភាពជិតស្និទ្ធរវាងប្រជាជាតិទាំងពីរ។​

ពិធីបុណ្យចូលឆ្នាំថ្មីប្រពៃណីជាតិ ក៏បានក្លាយជាឱកាសមួយសម្រាប់ថ្នាក់ដឹកនាំជាន់ខ្ពស់នៃប្រទេសទាំងពីរ ផ្ញើសារអបអរសាទរ ផ្លាស់ប្តូរសមិទ្ធផលមនោសញ្ចេតនា និងពិភាក្សាអំពីបញ្ហាសំខាន់ៗក្នុងទំនាក់ទំនងទ្វេភាគី។ ការដែលថ្នាក់ដឹកនាំជាន់ខ្ពស់នៃប្រទេសវៀតណាម​ ចូលរួមក្នុងសកម្មភាពអបអរសាទរបុណ្យចូលឆ្នាំថ្មីប្រពៃណី​របស់ប្រទេសកម្ពុជា និងរបស់បងប្អូនជនរួមជាតិខ្មែរវៀតណាម គឺបានបង្ហាញពីការយកចិត្តទុកដាក់យ៉ាងខ្លាំងរបស់បក្ស និងរដ្ឋវៀតណាម ចំពោះសហគមន៍ខ្មែរនៅក្នុងប្រទេសទាំងពីរ ព្រមទាំងជួយពង្រឹង និងកសាងកិច្ចសហប្រតិបត្តិការនយោបាយជាមួយប្រទេសជិតខាងដ៏មានតម្លៃនេះ។

សកម្មភាពផ្លាស់ប្តូរវប្បធម៌ ការចងសម្ព័ន្ធមេត្រីភាព និងការប្រាស្រ័យទាក់ទងគ្នារវាងប្រជាជន និងប្រជាជននៅសងខាងព្រំដែន បន្តត្រូវបានជំរុញយ៉ាងខ្លាំងក្លា ដោយបង្កើតបាននូវបរិយាកាសសាមគ្គីភាព មិត្តភាព និងការយល់ដឹងពីគ្នាទៅវិញទៅមក រួមចំណែកកសាងខ្សែបន្ទាត់ព្រំដែនសន្តិភាព ស្ថិរភាព និងការអភិវឌ្ឍ។ ការជាក់ស្តែងបានបង្ហាញឱ្យឃើញថា គឺចេញពីសកម្មភាពដ៏ជិតស្និទ្ធ និងជាក់ស្តែងទាំងនេះហើយ ទើបទំនាក់ទំនងសាមគ្គីភាព និងមិត្តភាពរវាងប្រជាជននៅសងខាងព្រំដែន កាន់តែត្រូវបានពង្រឹងជាលំដាប់។ ភាពស្អិតរមួតនេះបានបង្កើតឡើងនូវ «ខែលការពារទន់» រួមចំណែកបង្ការ និងទប់ស្កាត់តាំងពីដំបូង និងតាំងពីចម្ងាយនូវរាល់ហានិភ័យនានាដែលបង្កឡើង ក្នុងគោលបំណងរក្សាសន្តិសុខនយោបាយ ព្រមទាំងសណ្តាប់ធ្នាប់ និងសុវត្ថិភាពសង្គម។

យើងអាចអះអាងបានថា តាមរយៈសកម្មភាពជាក់ស្តែង និងមានប្រសិទ្ធភាពទាំងនេះ កិច្ចការបរទេសប្រជាជនរវាងបងប្អូនជនជាតិខ្មែរនៃប្រទេសទាំងពីរ បានរួមចំណែកយ៉ាងសំខាន់ក្នុងការកសាងខ្សែបន្ទាត់ព្រំដែនសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍប្រកបដោយចីរភាព ក្នុងដំណាក់កាលថ្មី។