អាជ្ញាធរ រកឃើញទំនិញចម្រុះ របស់ប្រទេសថៃ ដែលគ្មានឯកសារ បញ្ជាក់ត្រឹមត្រូវ អំពីប្រភពនាំចូល ជិត១០០ ប្រភេទ ក្នុងសង្កាត់ឃ្មួញ…!

ភ្នំពេញ៖ នៅថ្ងៃទី១៥ ខែមិថុនា ឆ្នាំ២០២៦ ក្រុមការងាររដ្ឋបាលខណ្ឌសែនសុខ សហការជាមួយការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលរាជធានីភ្នំពេញ សាខាអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង (កបប) ការិយាល័យគយនិងរដ្ឋាករខណ្ឌសែនសុខ និងមន្ទីរកសិកម្មរាជធានីភ្នំពេញ ដោយមានការសម្របសម្រួលពីលោកស្រី ផាត់ សុគន្ធា ព្រះរាជអាជ្ញារង នៃអយ្យការអមសាលាដំបូងរាធានីភ្នំពេញ បានចុះត្រួតពិនិត្យទីតាំងឃ្លាំងស្តុកគ្រឿង ឧបភោគ-បរិភោគ របស់ក្រុមហ៊ុន បេក ឃើរស្មីត ឯ.ក ស្ថិតនៅផ្លូវបេតុង ភូមិឃ្មួញ សង្កាត់ឃ្មួញ មានចំនួន០២ទូរ គឺ ទូរកក និងទូរស្ងួត ឃើញមានប្រភេទទំនិញក្នុងទូរកក មានប្រតិវេទត៍គយ នាំចូលមកស្របច្បាប់ មានប្រភពមកពីប្រទេសចំនួន ០២គឺ ប្រទេសចិន និងប្រទេសវៀតណាម ។

ដោយឡែកក្នុងទូរស្ងួត ក្រុមការងារបានពិនិត្យឃើញមានទំនិញចម្រុះរបស់ប្រទេសថៃ ដែលគ្មានឯកសារបញ្ជាក់ត្រឹមត្រូវអំពីប្រភពនាំចូល មានចំនួន ៩១ប្រភេទ ។

ដោយទទួលបានការសម្របសម្រួលនីតិវិធីផ្លូវច្បាប់​ពី លោកស្រី ផាត់ សុគន្ធា ព្រះរាជអាជ្ញារង នៃអយ្យការអមសាលាដំបូងរាធានីភ្នំពេញ ​ ក្រុមការងារចម្រុះបានសម្រេចដូចខាងក្រោម៖

១. បិទឃ្លុំជាបណ្ដោះអាសន្ន នូវទូរស្ងួតដែលស្តុកទំនិញចម្រុះរបស់ប្រទេសថៃ ដែលគ្មានឯកសារបញ្ជាក់ត្រឹមត្រូវអំពីប្រភពនាំចូលមានចំនួន ៩១ប្រភេទ ។

២.​ បញ្ជូនតំណាងម្ចាស់ទីតាំង ទៅស្នងការដ្ឋាននគរបាលរាជធានីភ្នំពេញ ដើម្បីសាកសួរបន្តតាមនីតិវិធី ។